ਬਾਲ ਬਰਾਂਮਾਹ \ ਇੰਦਰਜੀਤ ਕਮਲ
ਰੁੱਤਾਂ ਦੀ ਹੈ ਮਾਲਾ ਮੌਸਮ !
ਕਿੰਨੇ ਰੰਗਾਂ ਵਾਲਾ ਮੌਸਮ !

ਜਨਵਰੀ ਫ਼ਰਵਰੀ ਠੰਡ ਲਿਆਵੇ ,
ਮਾਰਚ ਸਾਡਾ ਦਿਲ ਬਹਿਲਾਵੇ ,
ਅਪ੍ਰੈਲ ਮਹੀਨਾ ਹੋ ਜਾਂਦਾ ਹੈ,
ਗਰਮੀ ਸਰਦੀ ਵਾਲਾ ਮੌਸਮ !

ਆਵੇ ਮਈ ਤੇ ਜੂਨ ਮਹੀਨਾ,
ਸੁਸਤੀ ਗਰਮੀ ਅਤੇ ਪਸੀਨਾ ,
ਇਸ ਵਿਚ ਅਖਾਂ ਨੂੰ ਸੰਭਾਲੋ ,
ਹੈ ਬਿਮਾਰੀ ਵਾਲਾ ਮੌਸਮ !

ਇਸ ਤੋਂ ਮਗਰੋਂ ਆਈ ਜੁਲਾਈ ,
ਇਸ ਨੇ ਹੈ ਵਰਖਾ ਵਰ੍ਸਾਈ ,
ਜਿਸ ਦੇ ਕਾਰਨ ਗਰਮੀ ਘਟਦੀ,
ਹੋ ਜਾਵੇ ਮਤਵਾਲਾ ਮੌਸਮ !

ਜਦੋਂ ਅਗਸਤ ਮਹੀਨਾ ਆਇਆ .
ਫੁੱਲਾਂ ਉੱਪਰ ਜੋਬਨ ਛਾਇਆ ,
ਰਲਮਿਲ ਖਾਈਏ ਖੀਰਾਂ ਪੁੜੇ ,
ਗਿਧੇ ਭੰਗੜੇ ਵਾਲਾ ਮੌਸਮ !

ਆਏ ਸਿਤੰਬਰ ਤੇ ਅਕਤੂਬਰ ,
ਫਸਲਾਂ ਪਾਵਣ ਲੱਗੀਆਂ ਝੂਮਰ,
ਗਰਮੀ ਸਰਦੀ ਰਲਿਮਿਲੀ ਵਿਚ,
ਬਣ ਜਾਂਦੈ ਮਤਵਾਲਾ ਮੌਸਮ !

ਆਵੇ ਛਾਲਾਂ ਮਾਰ ਨਵੰਬਰ ,
ਮਗਰੇ ਨੱਠਾ ਆਏ ਦਿਸੰਬਰ
ਕੰਬਲ ਕੋਟ ਰਜਾਈ ਕਢੋ !
ਲੈਕੇ ਆਇਆ ਪਾਲਾ ਮੌਸਮ!