ਬਦਲਦੇ ਰਿਸ਼ਤੇ \ ਇੰਦਰਜੀਤ ਕਮਲ

ਇੱਕ ਦੋਸਤ ਨੇ ਮੈਨੂੰ ਕਰਿਆਨੇ ਦੀ ਦੁਕਾਨ ਤੇ ਖੜ੍ਹੇ ਨੂੰ ਵੇਖਕੇ ਅੰਦਰ ਆਵਾਜ਼ ਮਾਰ ਲਈ ਕਹਿੰਦਾ ,
"ਆਓ ਤੁਹਾਡੀ ਪ੍ਰਧਾਨ ਜੀ ਨਾਲ ਮੁਲਾਕਾਤ ਕਰਵਾਵਾਂ , ਫਿਰ ਦੁਕਾਨਦਾਰ ਵੱਲ ਇਸ਼ਾਰਾ ਕਰਕੇ ਕਹਿੰਦਾ ਇਹ ਨੇ ਗਊ ਰੱਖਿਆ ਸਮਿਤੀ ਦੇ ਪ੍ਰਧਾਨ ............. ਜੀ "
ਦੁਕਾਨਦਾਰ ਨੇ ਦੋਵੇਂ ਹੱਥ ਜੋੜਕੇ ਬੜੇ ਹੀ ਮਿੱਠੇ ਸ਼ਬਦਾਂ ਨਾਲ ਮੇਰਾ ਸਵਾਗਤ ਕੀਤਾ ਤੇ ਬੈਠਣ ਲਈ ਕਿਹਾ
ਬੈਠਦਿਆਂ ਹੀ ਪ੍ਰਧਾਨ ਜੀ ਨੇ ਫੋਟੋਆਂ ਵਾਲੀ ਐਲਬਮ ਮੇਰੇ ਅੱਗੇ ਰੱਖ ਦਿੱਤੀ, ਜਿਸ ਵਿੱਚ ਕਈ ਤਰ੍ਹਾਂ ਦੀਆਂ ਫੋਟੋਆਂ ਸਨ ਜਿਹਨਾਂ ਵਿੱਚ ਗਊਆਂ ਨਾਲ ਭਰੇ ਟਰੱਕਾਂ ਦੀਆਂ ਫੋਟੋਆਂ ਵੀ ਸਨ ਜੋ ਪ੍ਰਧਾਨ ਜੀ ਨੇ ਪੁਲਿਸ ਨੂੰ ਸੂਚਿਤ ਕਰਕੇ ਕਾਬੂ ਕਰਵਾਏ ਸਨ
" ਅਖੀਰ ਗਊ ਮਾਤਾ ਨੂੰ ਬਚਾਉਨਾ ਸਾਡਾ ਹਿੰਦੁਆਂ ਦਾ ਫਰਜ਼ ਏ " ਇੰਨੀ ਗੱਲ ਸੁਣ ਕੇ ਮੈਂ ਜਾਣ ਦੀ ਇਜਾਜ਼ਤ ਮੰਗੀ , ਪਰ ਚਾਹ ਆ ਜਾਣ ਕਰਕੇ ਪ੍ਰਧਾਨ ਜੀ ਨੇ ਰੋਕ ਲਿਆ
ਕੁਝ ਗੱਲਬਾਤ ਕਰਨ ਤੋਂ ਬਾਦ ਮੈਂ ਉਠਕੇ ਬਾਹਰ ਹੀ ਆ ਰਿਹਾ ਸਾਂ ਕਿ ਇੱਕ ਗਾਂ ਨੇ ਆਕੇ ਦੁਕਾਨਦਾਰ ਦੀ ਦੁਕਾਨ ਤੋਂ ਬਾਹਰ ਰੱਖੀ ਇੱਕ ਅਨਾਜ ਦੀ ਬੋਰੀ ਵਿੱਚ ਮੁੰਹ ਮਾਰ ਦਿੱਤਾ
ਦੁਕਾਨਦਾਰ ਨੇ ਨੌਕਰ ਨੂੰ ਮੋਤੀ ਜਿਹੀ ਗਾਲ੍ਹ ਕਢਕੇ ਕਿਹਾ,
" ਮਾਰ ਇਸ ਸਾਲੀ ਦੇ ਸਿਰ ਚ ਡਾਂਗ , ਇੱਕ ਤਾਂ ਇਹਨਾ ਅਵਾਰਾ ਡੰਗਰਾਂ ਨੇ ਜਾਨ ਲੈਣੀ ਕਰ ਰੱਖੀ ਏ !!"
ਮੈਂ ਸੋਚਾਂ ਵਿੱਚ ਪੈ ਗਿਆ ਕਿ ਆਪਣਾ ਨੁਕਸਾਨ ਵੇਖਕੇ ਕੇ ਮਾਂ ਇੱਕ ਦੰਮ ਸਾਲੀ ਕਿਵੇਂ ਬਣ ਗਈ ?  
18 -11-13