ਤੇਜੇ ਦਾ ਨਾਈਟ ਸੂਟ \ ਇੰਦਰਜੀਤ ਕਮਲ

                                          ਸਾਡੇ ਸਮਾਜ ਵਿੱਚ ਮਰਗ ਵੇਲੇ ਅਕਸਰ ਚਿੱਟੇ ਕੱਪੜੇ ਪਾਉਣ ਨੂੰ ਤਰਜੀਹ ਦਿੱਤੀ ਜਾਂਦੀ ਹੈ | ਤੇਜੇ ਦੇ ਗਵਾਂਢ  ਇੱਕ ਬਜੁਰਗ ਦੀ ਮੌਤ ਹੋ ਗਈ , ਜਿਸ ਕਾਰਨ ਕਾਫੀ ਲੋਕ ਇਕੱਠੇ ਹੋਏ ਸਨ | ਉਦੋਂ ਹੀ ਤੇਜਾ  ਫੌਜ ਚੋਂ ਛੁੱਟੀ  ਕੱਟਣ ਆਇਆ ਸੀ | ਉਹਦੇ ਕੋਲ ਰਾਤ ਨੂੰ ਸੌਂਣ ਵੇਲੇ ਪਾਉਣ ਵਾਲਾ ਕੋਈ ਕੱਪੜਾ ਨਹੀਂ ਸੀ |  ਉਹਨੇ ਪਿੰਡ ਦੀ ਹੀ ਇੱਕ ਦੁਕਾਨ ਤੋਂ ਚਿੱਟੇ ਰੰਗ ਦਾ ਕੱਪੜਾ ਲਿਆ ਤੇ ਪੁੱਛਦਾ ਪੁਛਾਉਂਦਾ ਦਰਜ਼ੀ ਦੇ ਘਰ ਚਲਾ ਗਿਆ | ਦਰਜ਼ੀ ਨੇ ਉਹਦੇ ਹੱਥੋਂ ਕੱਪੜਾ ਫੜਦਿਆਂ ਹੀ ਕਿਹਾ , " ਜਾਹ ਫੌਜੀਆ , ਵੀਹ ਪੰਝੀ ਮਿੰਟਾਂ ਚ ਭੇਜ  ਦੇਵਾਂਗਾ |"
                                          ਤੇਜਾ ਕਹਿੰਦਾ ," ਚਾ ਚਾ ਚਾ ਚਾ ਚਾਚਾ ਮੇਚਾ ?"
                                           ਦਰਜ਼ੀ ਕਹਿੰਦਾ ," ਰਿਹਾ ਨਾ ਫੌਜੀ ਦਾ ਫੌਜੀ ਹੀ  ! ਮੇਚੇ ਦੀ ਲੋੜ ਨਹੀਂ ਹੁੰਦੀ |"
                                          ਤੇਜਾ ਬੜਾ ਹੈਰਾਨ ਹੋਇਆ ਕਿ ਥੋੜੇ ਜਿਹੇ ਸਾਲਾਂ ਚ ਹੀ ਪਿੰਡ ਵਾਹਵਾ ਤਰੱਕੀ ਕਰ ਗਿਆ ਲਗਦਾ ਏ | ਬਿਨ੍ਹਾਂ ਮੇਚੇ ਤੋਂ ਹੀ ਨਾਇਟ ਸੂਟ  !! ਉਹ ਵੀ ਇੰਨੀ ਛੇਤੀ !!!!
                                                ਤੇਜੇ  ਨੂੰ ਅਚਵੀ  ਜਿਹੀ ਹੋਣ ਲੱਗ ਪਈ ਤੇ ਉਹ ਆਪ ਹੀ ਥੋੜੀ ਦੇਰ ਬਾਦ ਦਰਜ਼ੀ ਦੇ ਘਰ ਆ ਗਿਆ | ਦਰਜ਼ੀ ਗੁੱਛਾ ਮੁੱਛਾ ਜਿਹਾ ਕਰਕੇ ਕੱਪੜੇ ਫੜਾਉਣ ਲੱਗਾ ਤਾਂ ਤੇਜਾ ਕਹਿੰਦਾ ," ਚਾ ਚਾ ਚਾ ਚਾਚਾ ਤਹਿ ਤਾਂ ਕਰਦੇ |"
                                             ਦਰਜ਼ੀ  ਕਹਿੰਦਾ , " ਇਹਨੂੰ ਤਹਿ ਨਹੀਂ ਕਰੀਦਾ |" #KamalDiKalam
                                               ਤੇਜੇ ਨੇ ਪੁੱਛਿਆ , " ਪ ਪ ਪ ਪ ਪਰ ਕਿਓਂ ?"
                                               ਦਰਜ਼ੀ ਕਹਿੰਦਾ ,"  ਪਤਾ ਤਾਂ ਮੈਨੂੰ ਵੀ ਨਹੀਂ  | ਪਰ  ਦਾਦੇ ਪੜਦਾਦੇ ਤੋਂ ਇਹ ਕੰਮ ਕਰਦੇ ਆ ਰਹੇ ਹਾਂ , ਅੱਜ ਤੱਕ ਕਿਸੇ ਨੂੰ ਕਫਨ  ਤਹਿ ਕਰਕੇ  ਦਿੰਦਿਆਂ  ਨਹੀਂ ਵੇਖਿਆ |"