ਜਦੋਂ ਡਾਂਗਾਂ ਵਾਲਿਆਂ ਨੇ ਸਾਡੀ ਕਾਰ ਘੇਰੀ \ ਇੰਦਰਜੀਤ ਕਮਲ

ਕੱਲ੍ਹ ਸਾਨੂੰ ਕਿਸੇ ਕੰਮ ਮੋਹਾਲੀ ਤੇ ਚੰਡੀਗੜ੍ਹ  ਜਾਣਾ ਪਿਆ | ਮੇਰੇ ਨਾਲ ਮੇਰੀ ਆਪਣੀ ਬੇਟੀ ਦੇ ਨਾਲ ਉਹਦੀਆਂ ਤਿੰਨ ਸਹੇਲੀਆਂ ਸਨ |ਦੋ ਕੁੜੀਆਂ ਉੱਤਰ ਪ੍ਰਦੇਸ਼ ਦੀਆਂ ਸਨ ,ਜਿਹਨਾਂ ਵਾਸਤੇ ਪੰਜਾਬੀ ਬੋਲਣੀ  ਤਾਂ ਕੀ ਸਮਝਣੀ ਵੀ ਔਖੀ ਸੀ |ਮੇਰੀ ਡਿਉਟੀ ਲੱਗੀ ਸੀ ਕਿ ਇਹਨਾਂ ਬੱਚੀਆਂ  ਦੀ ਟ੍ਰੇਨਿੰਗ ਵਾਸਤੇ  ਬਣਦਾ ਸਾਰਾ ਇੰਤਜ਼ਾਮ ਕਰਕੇ ਆਵਾਂ |ਮੈਂ ਬੱਚੀਆਂ ਨੂੰ ਨਾਲ ਲੈ ਕੇ ਮੋਹਾਲੀ ਵੱਲ ਨੂੰ ਚੱਲ ਪਿਆ |ਅਸੀਂ ਆਪਸ ਵਿੱਚ ਸਲਾਹ ਕਰਦੇ ਜਾ ਰਹੇ ਸਾਂ ਕਿ ਪਹਿਲਾਂ ਕਿੱਥੇ ਜਾਣਾ ਹੈ ਤੇ ਬਾਦ ਚ ਕਿੱਥੇ |ਮੋਹਾਲੀ ਜਾਂਦੇ ਵਕਤ ਬਨੂੜ  ਤੋਂ ਪਹਿਲਾਂ ਸਾਨੂੰ ਸੜਕ ਦੇ ਉੱਤੇ ਇੱਕ ਭੀੜ ਨਜਰ ਆਈ |ਗੱਡੀ ਦੀ ਰਫਤਾਰ ਘਟਾਉਣੀ ਜ਼ਰੂਰੀ ਸੀ | ਭੀੜ ਦੇ ਕੋਲ ਪੰਹੁਚਦਿਆਂ ਹੀ ਪੰਜ ਸੱਤ ਡਾਂਗਾਂ ਵਾਲੇ ਸਾਡੀ ਕਾਰ ਦੇ ਅੱਗੇ ਆ ਕੇ ਖੜੇ ਹੋ ਗਏ |

ਪਿੱਛੇ ਬੈਠੀ ਉੱਤਰ ਪ੍ਰਦੇਸ਼ ਦੀ ਇੱਕ ਕੁੜੀ ਬੋਲੀ , " हाए अंक्ल अब क्या होगा  !!"

ਮੇਰਾ ਹਾਸਾ ਨਿਕਲ ਗਿਆ ਮੈਂ ਕਿਹਾ ,

 " ਕੁਝ  ਨਾ ਕੁਝ ਤਾਂ ਜਰੂਰ ਹੋਏਗਾ "

ਮੈਂ ਕਾਰ ਦੀ ਬਾਰੀ ਦਾ ਸ਼ੀਸ਼ਾ ਥੱਲੇ ਕੀਤਾ ਤਾਂ ਉਹ ਬੰਦੇ ਬੋਲੇ , 

" ਆਓ ਜੀ , ਲੰਗਰ ਛਕ ਕੇ ਜਾਓ "

ਮੈਂ ਕਿਹਾ ,

" ਲੰਗਰ ਤਾਂ ਠੀਕ ਏ , ਪਰ ਇਹ ਡਾਂਗਾਂ ਨਾਲ ਲੰਗਰ ਛਕਾਉਣ ਵਾਲਾ ਤਰੀਕਾ ਪਹਿਲੀ ਵਾਰ ਵੇਖਿਆ ਏ "

ਉਹ ਨੌਜਵਾਨ ਹੱਸਦੇ ਹੋਏ ਬੋਲੇ ,

" ਅਸਲ ਚ ਇਹਨਾਂ ਉੱਤੇ ਕੇਸਰੀ ਝੰਡੇ ਸਨ ਭੱਜ ਦੌੜ ਚ ਉਹ ਉੱਤਰ ਗਏ ਨੇ "

ਮੈਂ ਕਿਹਾ,

" ਫੇਰ ਇਹਨਾਂ ਡੰਡਿਆਂ ਨੂੰ ਵੀ ਪਾਸੇ ਰੱਖੋ ਕਿਓਂ ਕਿਸੇ ਦਾ ਸਾਹ ਸੂਤੋਗੇ "

ਉਹਨਾਂ ਹੱਸਦੇ ਹੋਏ ਡੰਡੇ ਸੜਕ ਦੇ ਇੱਕ ਪਾਸੇ ਰੱਖ ਦਿੱਤੇ 

ਫਿਰ ਮੈਂ ਉਹਨਾਂ ਨੂੰ ਦੱਸਿਆ ਕਿ ਅਸੀਂ ਘਰੋਂ ਨਾਸ਼ਤਾ ਕਰਕੇ ਚੱਲੇ ਹਾਂ , ਲੰਗਰ ਬਾਰੇ ਵਾਪਸੀ ਤੇ ਵੇਖਾਂਗੇ |ਉਹਨਾਂ ਸਾਨੂੰ ਕੜਾਹ ਪ੍ਰਸ਼ਾਦ ਦੇ ਡੋਨੇ ਫੜਾਏ ਤੇ ਅਸੀਂ ਮੁੰਹ ਮਿੱਠਾ ਕਰਦੇ ਹੋਏ ਆਪਣੀ ਮੰਜ਼ਿਲ ਵੱਲ ਚੱਲ ਪਏ 28-12-13